Artisti i njohur Zeni Ballazhi Rektorit të USHT-së Doc. Dr. Vullnet Ameti i dhuroi logon e 100 vjetorit të Pavarësisë së Shqipërisë

Në Universitetin Shtetëror të Tetovës qëndroi sot për vizitë pune disenjatori i Logos së 100 Vjetorit Pavarësisë së Shqipërisë, Zeni Ballazhi i shoqëruar nga aktorët Mentor Zymberaj dhe Ramadan Malaj.
Në USHT, artisti i njohur Zeni Ballazhi u prit nga Rektori, Doc.dr.Vullnet Ameti, Prorektori për arsim, Doc.dr.Fehari Ramadani, Prorektori për bashkëpunim ndërkombëtar, Prof.dr.Arbër Çeliku, Sekretari i përgjithshëm, juristi i diplomuar Adem Beadini dhe Kryetari i Parlamentit Studentor të USHT-së, Shaban Arsllani.
Në fillim, Rektori Doc.dr.Vullnet Ameti, në emër të studentëve dhe profesorëve të Universitetit Shtetëror të Tetovës, mysafirëve  u shprehi  falënderimet për vizitën e tyre, dhe theksoi se prania e disenjatorit të Logos së 100 Vjetorit Pavarësisë së Shqipërisë dhe Flamurit shqiptar është një nder i madh që i bëhet Universitetit tonë.
Po ashtu, Rektori i USHT-së delegacionin e lartpërmendur e njohu me ecurinë e punës akademike, aktivitetet e ndryshme që realizohen, si dhe me bashkëpunimin e USHT-së me universitetet publike dhe private nga vendi, rajoni dhe ato ndërkombëtare.
“Universiteti ynë është bërë pjesë e rëndësishme e organizimit të aktiviteteve të ndryshme për nder të 100 vjetorit të Flamurit, po ashtu i prezantova  zhvillimet më të reja në Universitetin tonë, ecurinë e veprimtarisë arsimore dhe shkencore, përgatitjet për regjistrimin e studentëve të rinj, bashkëpunimin e frytshëm të USHT-së me universitetet më të njohura nga vendi dhe rajoni, me theks të veçantë për bashkëpunimin me universitetet publike dhe private nga Republika e Shqipërisë”, tha Rektori Doc.dr. Vullnet Ameti.
Z.Ballazhi dhe aktorët Mentor Zymberaj dhe Ramadan Malaj i shprehën urimet e tyre vëllazërore për detyrën e re, Rektorit Doc.dr. Vullnet Ameti dhe e vlerësuan lartë punën e udhëheqësisë së Universitetit Shtetëror të Tetovës.
“Për mua kjo është vizita e parë në Universitetin Shtetëror të Tetovës dhe më lejoni të Ju uroj për detyrën Tuaj, sikundër Ju uroj të keni suksese në udhëheqjen e këtij institucioni të arsimit të lartë në gjuhën shqipe në Republikën e Maqedonisë dhe ky takim shërben që në të ardhmen të ngremë bashkëpunim, do të jetë një shtytje, sidomos për  pjesën e artit” deklaroi Zeni Ballazhi, i cili njëherit Rektorit Doc.dr.Vullnet Ametit i dhuroi logon e  100 vjetorit të Pavarësisë së Shqipërisë.
Me këtë rast, në  shenjë falënderimi dhe  mirënjohje me rastin e vizitës në Universitetin Shtetëror të Tetovës,  për përkushtimin e veçantë ndaj artit dhe  kulturës kombëtare, Rektori i USHT-së, z. Zeni Ballazhit i ndau plaketën me logon e Universitetit.

Zyra për Informim