Почитувани пријатели на Универзитетот,

Со чувство на гордост и со длабока благодарност денес стојам пред вас за да го прославиме овој исклучителен момент во историјата на нашата институција: 30-годишнината од основањето на Универзитетот во Тетово.

Денес го одбележуваме јубилејот на една образовна институција која беше основана со храброст, волја и посветеност на нашиот народ, во време кога идејата за универзитет на албански јазик се соочуваше со големи предизвици и отпори.

Нашиот универзитет не е само зграда. Тој е симбол на напорите и вербата на еден народ во моќта на знаењето.

На овој јубилеј мора да се вратиме на историјата на Универзитетот во Тетово, во чии страници се запишани жртвите, страдањата, болките, но и многуте успеси.

На овој јубилеј му изразуваме најдлабока почит на историскиот ректор, професорот Фадиљ Сулејмани, чие име е синоним за Универзитетот во Тетово.

Оваа година објавивме комплет од делата на професорот Фадиљ Сулејмани, неговиот вреден интелектуален придонес во областа на албанологијата, лингвистиката и етнографијата.

Го отворивме аголот на сеќавањето за професорот Фадиљ Сулејмани, каде што веќе започнаа да се организираат настани поврзани со нашата култура.

На овој јубилеј со најдлабока почит и чест го одбележуваме и маченикот за Универзитетот во Тетово, Абдиљсељам Емини.

Портретите на професорот Фадиљ Сулејмани и на Абдиљсељам Емини, кои сега се наоѓаат во канцеларијата на ректорот, не се само уметнички дела, туку и дух што нè потсетува на целата историја на нашиот универзитет.

На овој јубилеј им изразуваме благодарност и признание и на потписниците на основањето на Универзитетот во Тетово.

Им оддаваме чест на сите оние кои придонесоа значително за нашиот универзитет.

Оваа година ја признаваме заслугата на професорот Невзат Халили, кого го предложивме за титулата  Doctor Honoris Causa за неговата вредна дејност во поддршката на албанското национално прашање, за придонесот во образованието, политиката и јавниот живот, како и за неговата постојана поддршка за основањето на Универзитетот во Тетово.

Им изразуваме длабока благодарност на сите наши граѓани кои го поддржаа Универзитетот во Тетово материјално и морално, како и на оние кои овозможија првите предавања да се одржат во нивните домови.

Го цениме придонесот на студентите од првите генерации, бидејќи тие му дадоа живот на нашиот универзитет.

Од нашите скромни почетоци, денес прераснавме во динамична академска институција, која претставува светилник на интелектуалниот и на културниот развој.

Нашите достигнувања низ годините не се само бројки или позиции на листи, туку безброј приказни за трансформација, зајакнување и успех што нашите студенти, академскиот кадар и дипломираните студенти ги носат со себе.

Затоа, на овој јубилеј, сакам да изразам благодарност и длабока почит кон сите студенти, академскиот кадар, административниот кадар и сите останати вработени на нашиот универзитет за нивниот придонес низ сите овие години.

Со желба и страст, со многу труд, напор, жртва и континуирани напори низ овие децении, работевме на промовирање на знаењето, научното истражување и иновациите.

Денес, само неколку дена пред завршувањето на зимскиот семестар од академската 2024/2025 г. и календарската 2024 година, ако се навратиме и погледнеме наназад, се присетуваме на моментите кои го одбележаа успехот, но и на предизвиците со кои заеднички се соочивме.

Сакам да ги нагласам некои од нашите најзначајни достигнувања, кои го одразуваат нашиот визионерски пристап и посветеност за унапредување на науката.

Оваа година го организиравме Седмиот меѓународен конгрес за природни, здравствени и технолошки науки, платформа за напредување на применетите и природните науки, како и Осмиот меѓународен конгрес за хуманистички, општествени науки и уметности, каде што истражувачи од целиот свет споделија знаења за културната и за хуманитарната разновидност.

Во рамките на конгресите беа промовирани новите броеви на научните списанија кои се издаваат од соодветните факултети. Списанијата се индексирани во EBSCO, CROSSREF, Google Scholar, Index Copernicus International, CEEOL, MLA International Bibliography, ERIHPLUS, а сите имаат ISI Impact Factor.

Го одржавме осумнаесеттото издание на Меѓународниот семинар за албанологија, посветен главно на албанолошките студии и на културното наследство на албанскиот народ.

Како универзитет, се залагавме и се залагаме за промоција на мирот, меѓукултурната комуникација и научниот дијалог на Балканот и пошироко. За оваа цел организиравме научна конференција на тема „Иднината на Западниот Балкан по руската агресија врз Украина – Што следува?“ Дополнително, го промовиравме преведеното дело „Езерата и Империите во историјата на Македонија“ од познатите Џејмс Петифер и Миранда Викерс.

Особено внимание посветивме на значајни личности од регионот и од светот. Може да го издвоиме разговорот со познатиот британски новинар и аналитичар Тим Џуда за реалноста по војната во Украина и развојот на Западниот Балкан.

Почитувани присутни,

Оваа година реализиравме неколку трансформативни проекти кои го збогатија академското и студентското искуство.

Студиската програма за информатика го реализираше проектот Дигитална форензика, кој обезбеди поддршка за создавање лабораторија за студентите.

Во рамките на Студентската сцена на Универзитетот во Тетово, финансирана од Министерството за култура, беа изведени студентски театарски претстави како дел од редовниот репертоар на Сцената за драмски и аудиовизуелни уметности на Факултетот за уметности во Тетово.

Факултетот за прехранбена технологија и исхрана го доби проектот за Специјализација на кадровските капацитети за зелена трансформација – Zero Waste, финансиран и поддржан од Турската агенција за соработка и координација (ТИКА).

За подобрување на научната инфраструктура, обезбедивме финансиска поддршка за лабораториска опрема за Факултетот за прехранбена технологија, со што се подобри квалитетот на истражувањата и наставата. Министерството за земјоделство и шумарство ќе финансира проект со 12 милиони денари за купување опрема за лабораториски анализи за контрола на квалитетот и безбедноста на храната, животната средина, фармацијата и други производи за општа употреба. Овие анализи ќе се спроведуваат во Лабораторијата за контрола на храна, која оваа година беше акредитирана според меѓународни стандарди.

Горди сме што во рамките на меѓународните проекти сме партнери во истражувачката иницијатива на Magna Charta Observatory, која има цел зачувување на интегритетот на интелектуалната и научната работа во институциите и општествата, преку градење мостови на доверба помеѓу универзитетите на локално и на глобално ниво.

Дополнително, меѓународната обука „Collaborative Online International Learning“ (COIL), реализирана во соработка со мрежата Aurora, донесе современи искуства и методи за нашиот кадар и студентите.

Во областа на образованието и студентската креативност, успешно го завршивме проектот „Креативни студенти преку медиумска писменост“, финансиран од USAID-Irex.

Социјалното и едукативното вклучување останува наш приоритет. Проектот за инклузија на деца со посебни образовни потреби, поддржан од здружението „Отворете ги прозорците“, е следен чекор кон поинклузивно општество и еднаквост во образованието.

Во областа на економскиот развој и претприемништвото, проектот реализиран од Економскиот факултет, со поддршка на Министерството за економија, резултираше со основање Центар за истражување и развој на претприемништвото. Овој центар има цел не само да го поттикне образованието за младите претприемачи, туку и економскиот развој на руралните подрачја и намалување на невработеноста.

Во текот на оваа година, Универзитетот во Тетово потпиша серија меморандуми и договори за зајакнување на соработката со многубројни локални, регионални и меѓународни институции, со цел:

• поттикнување на соработката, меѓусебното разбирање и развојот во областа на образованието и научните истражувања;
• реализација на заеднички истражувачки и пилот проекти;
• размена на истражувачки и наставен кадар;
• размена на студенти со многу регионални и меѓународни универзитети;
• организирање заеднички семинари, конференции и работилници;
• размена на научни публикации;
• краткорочни посети на високи членови на кадарот за консултации, предавања и планирање на проекти;
• долгорочни посети на истражувачки и технички кадар за обуки, постдипломски студии или учество во заеднички истражувачки проекти;
• учество во меѓународни програми;
• поттикнување контакти со истакнати научници од други академски центри во светот за учество во меѓународни проекти од голем обем, како и меѓусебна поддршка при планирање и имплементација на посети во соодветни земји.

Ова е доказ дека досега ја зачувавме и зајакнавме добрата традиција на соработка со сите универзитети и различни институции, како во нашата земја така и на меѓународната сцена.

На овој јубилеен датум ние се радуваме и на функционирањето на студентскиот дом, почетокот на специјализациите во областа на медицината, како и основањето и функционирањето на синдикатот на вработените на Универзитетот во Тетово.

Има многу други достигнувања и настани, било да се научни, културни, уметнички или спортски, кои би требало да се одбележат на овој јубилеј, но списокот е долг.

Сите овие проекти се доказ за нашата посветеност да придонесеме кон одржливиот развој на Универзитетот и да ја исполниме нашата визија како институција за високо образование која носи позитивни промени во општеството.

Дами и господа,

Додека ја славиме нашата минатост и сегашност, исто така, мораме со храброст и амбиција да гледаме напред. Предизвиците на овој век, брзиот технолошки напредок, еколошките кризи и социјалните нееднаквости – бараат универзитетите да бидат повеќе од центри за учење и студирање. Универзитетите треба да бидат центри на иновација, одржливост и социјална одговорност. Тие треба да создадат што повеќе врски со заедницата и да ги земат предвид новите барања на пазарот на трудот. Ова се цели што ги остваруваме со посветеност и долгорочна стратегија.

Нека овој јубилеј биде потсетник за нашата должност да се прилагодуваме, растеме и водиме во времиња на трансформации. Нашата визија за иднината вклучува не само академска извонредност, туку и посветеност кон еднаквоста и инклузијата.

Овој историски момент не би бил можен без непоколебливата поддршка на многу луѓе.

За нашите студенти и дипломирани студенти:

Вие сте душата на оваа институција, причината за нашето постоење и доказ за нашиот успех!

За нашите факултети и нашиот кадар:

Вашата посветеност е основата врз која овој универзитет гордо стои.

За нашите партнери и поддржувачи:

Вашата верба во нашата мисија беше важна и инспиративна низ нашето патување.

Додека го славиме овој 30-годишен јубилеј, да го потврдиме нашиот ангажман кон принципите што нè водеа досега: знаење, интегритет и посветеност. Да ја почитуваме нашата историја, да ја славиме сегашноста и со увереност и решителност да ги прифатиме предизвиците и можностите на иднината.

Нека е благословен Универзитетот во Тетово!

Проф. д-р Јусуф Зејнели

Ректор на Универзитетот во Тетово