Të nderuar miq të Universitetit,

Fjalën time dua ta nis me falenderimin dhe mirënjohjen e thellë për të gjithë studentët tanë, të cilët 28 vjet më parë, me guximin shembullor dhe pa asnjë hezitim u bënë shtylla më vitale e çerdhes së parë të arsimit të lartë në gjuhën shqipe në këto hapësira. Ata u bënë protagonistët, misionarët, pishtarët dhe bartësit kryesorë të platformës së Universitetit të Tetovës, të themeluar nga intelektualët shqiptarë në krye me Rektorin e parë dhe historik, Prof. Dr. Fadil Sulejmanin.

Dua të shpreh respektin e thellë edhe për dëshmorin e arsimit shqip, Abdylselam Eminin, gjaku i të cilit u bë dritë e diturisë në rrugën e ndërtimit të Universitetit të Tetovës!

Nderim të veçantë meritojnë dhe vëllezërit tanë, që e ndihmuan dhe i shërbyen Universitetit, duke i shndërruar shtëpitë në auditorë universitarë, ku u edukuan, fituan dije dhe u aftësuan profesionalisht studentët e parë të këtij institucioni. Nuk i harrojmë kurrë as përpjekjet e familjeve shqiptare, që dhanë kontribut për ngritjen në këmbë të shëndosha të Universitetit tonë.

Pas 28 vitesh punë të pandalshme, Universiteti i Tetovës është shndërruar në qendër të mirëfilltë edukimi e arsimimi, jo vetëm në Maqedoninë e Veriut, por edhe në rajon. Në këtë tempull të dijes, sot studiojnë të rinj e të reja nga vendi ynë, nga Republika e Shqipërisë, Republika e Kosovës, Lugina e Preshevës dhe nga mbarë diaspora shqiptare.

Ata, bashkë me profesorët e tyre të vyeshëm, kanë lënë gjurmë të pashlyeshme në proceset më të rëndësishme nëpër të cilat ka kaluar Universiteti i Tetovës, që nga themelimi, fillimi i ligjëratave të para e deri te periudha pas zyrtarizimit, integrimit dhe përparimit të Universitetit.
Me pietet të veçantë i kujtojmë edhe kontribuesit, të cilët nuk janë më në mesin tonë, duke uruar përjetësi për veprat e tyre!

Të nderuar,

Gjatë këtij viti akademik Universiteti ynë ka shënuar rezultate të konsiderueshme në të gjitha fushat dhe ka arritur t’i realizojë qëllimet kryesore dhe misionin e tij si institucion i arsimimit sipëror në vendin tonë.

Nga dhjetori i vitit të kaluar e deri sot, kur edhe e shënojmë këtë përvjetor, me përkushtimin e drejtuesve të Universitetit i kemi realizuar prioritetet kryesore të këtij institucioni, siç janë:

• Regjistrimi i studentëve për herë të parë në vitin akademik 2022/23 në ciklin e parë dhe të dytë të studimeve, me mbi 3000 studentë të regjistruar, gjë që në bazë të analizave krahasimore me vitet e kaluara, është një rritje prej 32%.
• Digjitalizimi i të gjitha shërbimeve studentore dhe procedurave të tjera administrative, në favor të lehtësimit të kryerjes së detyrimeve dhe shërbimeve studentore.
• Mbështetja për studentët me sukses të dalluar, duke i liruar plotësisht nga detyrimet e pagesave të semestrave.
  • Këtu vlen të theksojmë se, për ekselentët e UT-së janë ndarë 96 bursa për studentët e ciklit të parë dhe 17 bursa për studentët e ciklit të dytë, për vitin akademik 2022/2023.
• Përmbyllja e procesit të akreditimit të 183 programeve studimore, prej të cilave 89 programe studimore në ciklin e parë të studimeve dhe 94 programe në ciklin e dytë, të përshtatur me kërkesat e tregut të punës, pas procesit të evaluimit të realizuar me punëdhënësit;
• Fillimi i procesit të riakreditimit të 17 programeve në ciklin e tretë të studimeve – studimet e doktoraturës, si dhe akreditimi i programeve të reja në këtë cikël të studimeve;

Rëndësi e theksuar, në vitin që po lëmë pas i është kushtuar edhe përsosjes së vazhdueshme profesionale, ku këtë vit janë bërë hapa të mëdhenj që vlejnë të theksohen:

• Marrja e autorizimit nga Ministria e Shëndetësisë, me të cilin mundësohet që në Fakultetin e Shkencave Mjekësore të Universitetit të Tetovës, të realizohen specializimet, për degët: mjekësi familjare, pediatri, gjinekologji, kirurgji e përgjithshme, kardiologji, mjekësi interne dhe psikiatri si dhe 20 autorizime për profesorë dhe mjekë të cilët do të jenë mentorë dhe edukatorë të kuadrit të ri.
• Akreditimi i trajnimit të arsimtarëve dhe shërbimeve profesionale të shkollave fillore në vendin tonë për realizimin e gjashtë moduleve: Edukim në kontekst bashkëkohor; Zhvillim i shkathtësive socio-emocionale te nxënësit; Barazia gjinore dhe sensitiviteti gjinor në shkollë; Mësimdhënie e bazuar në qasje ndaj problemit; Mësimdhënie për zhvillimin e të menduarit kritik te nxënësit; Dizajnimi i testeve objektive të njohurive; Zhvillimi i shkathtësive sociale dhe vetëbesimit te nxënësit, ballafaqimi me sjelljet problematike dhe krijimi i klimës pozitive socio-emocionale në klasë.

Është e qartë se, pa kërkime dhe rezultate shkencore, ne nuk mund të udhëheqim rrugën në kërkimin e zgjidhjeve për sfidat e mëdha të kohës sonë, si humbja e biodiversitetit, ndryshimet klimatike dhe pabarazia sociale. Si një universitet multidisiplinar, Universiteti i Tetovës ka potencial të shkëlqyeshëm për të bërë zbulime inovatore dhe për të promovuar aplikimin e tyre. Për këtë, ne kemi nevojë për partnerë dhe mbështetje. E ardhmja e qëndrueshme ndërtohet së bashku. Me sukses të plotë kemi organizuar dhjetëra aktivitete me karakter shkencor dhe kulturor, dhe për efekt kohe i veçojmë vetëm disa prej tyre, si:

• Kongresin III Ndërkombëtar të Shkencave të Natyrës, Mjekësisë dhe Teknologjive, në kuadër të të cilit u zhvilluan 5 konferenca shkencore në bashkëpunim me 6 universitete të rajonit dhe 483 pjesëmarrës, si dhe Kongresin IV Ndërkombëtar të Shkencave Humane, Sociale dhe Arteve, në programin e të cilit i zhvilluan punimet 5 konferenca shkencore të fushave përkatëse në bashkëpunim me 25 universitete dhe morën pjesë 485 hulumtues shkencorë.
• Organizimin e Seminarin XVI Ndërkombëtar të Albanologjisë, me temë “Kultura dhe globalizimi”. Mbi 100 studiues të shkencave të gjuhësisë, letërsisë, historisë dhe etnokulturës, gjatë punimeve të këtij edicioni i prezantuan kumtesat e tyre shkencore, duke sjellë edhe mendime të reja mbi këto tema, të cilat janë në interesin e studiuesve, por edhe të mbarë opinionit;
• Organizimin e edicionit XVI të manifestimit kulturor “Ura me tri harqe”. Ky aktivitet tradicional është një projekt i përbashkët që organizohet nga Universiteti i Tetovës, Universiteti i Arteve i Tiranës dhe Universiteti i Prishtinës dhe është një sfidë për studentët e arteve, në dëshmimin e talentit dhe shprehjes së vizionit të tyre mbi artin;
• Rëndësi të veçantë i kemi kushtuar edhe botimit të revistave shkencore me bord shkencor ndërkombëtar ku publikohen hulumtimet dhe studimet e studiuesve nga vendi, rajoni dhe më gjerë.
• Nga ky vit 11 revistat e fakulteteve të Universitetit të Tetovës janë indeksuar në databazën DOAJ, gjë që kulminoi me dhënien e faktorit të impaktit nga Baza e indeksimit ISI Impact Factor.

Gjatë vitit që lëmë pas, në bashkëpunim me institucione vendore dhe ndërkombëtare me sukses të plotë i kemi përmbyllur disa projekte kërkimore-shkencore, si:

•  “Sjelljet e lidhura me shëndetin te fëmijët e moshës shkollore në Republikën e Maqedonisë së Veriut” (HBSC);
• Bashkëpunim për inovacion dhe shkëmbim praktikash, Partneritete strategjike për të rinjtë ERASMUS+, KA205
• “ART BLOSSOM” ose “LULËZIMI I ARTIT” – projekt që synon rritjen e punësimit të grave të reja të papuna, nëpërmjet kultivimit të luleve, dhe të rinjve të cilët janë ekspertë dhe kompetentë në artizanate përmes artit dhe teknologjive inovative.
• “Matja e perceptimeve të nivelit të korrupsionit në institucionet publike në rajonin e Pollogut” – i realizuar në bashkëpunim me Universitetin Vrije të Amsterdamit dhe në kuadër të Aleancës Aurora.
• Për herë të parë, në organizim të Qendrës për Paqe dhe Komunikim Transkulturor të Universitetit të Tetovës – Universitetit të Ilinoisit Verior (SHBA), dhe Këndit Amerikan në Tetovë e realizuam Shkollën Verore 2022, që kishte për qëllim të ofrojë një prezantim të detajuar të sundimit të ligjit në Maqedoninë e Veriut.

Përpos projekteve të lartpërmendura, ne kemi mbajtur e organizuar dhjetëra aktivitete të tjera, si promovime librash, akademi në nderim të figurave të shquara dhe shënim të datave me rëndësi nga historia jonë kombëtare. Këtu veçojmë promovinim e Monografisë të Universitetit të Tetovës, gjatë periudhës kohore 1994/95 – 2004/2005, e cila u promovua pikërisht në vigjiljen e 27-vjetorit të fillimit të ligjëratave të para. Për t’u theksuar është Akademia përkujtimore për Rafi Halilin – simbolin e rezistencës shqiptare, Simpoziumin shkencor, me temë: “Kontributi i organizatës Kushtrimi i Lirisë dhe i Rafi Halilit në historinë shqiptare”; të cilin do ta përkujtojmë përgjithmonë si atdhetar i papërkulur, veprimtar politik i palodhur për parandalimin e tendencave diskriminuese nga regjimi i diktaturës komuniste jugosllave ndaj shqiptarëve në Maqedoni, Kosovë dhe më gjerë, si dhe përurimin e veprave “Rexhep Qosja – filozof, ideolog dhe politikan i çështjes kombëtare” dhe “Nëna ime Mihana Lama”, të gjeneralit të njohur Prof. Dr. Kudusi Lama;

Me rastin e festave të Nëntorit e kemi bërë shpalosjen e emërtimeve të amfiteatrove kryesorë, me emrat e figurave emblematike, që kanë lënë gjurmë të pashlyeshme në historinë tonë kombëtare. Tre amfiteatrot e Universitetit tonë tashmë i bartin emrat: Abdylselam Emini – dëshmori i arsimit shqip, Rafi Halili – veprimtari i çështjes kombëtare, Sevasti dhe Parashqevi Qiriazi – dy mësueset e para të gjuhës shqipe nga Manastiri.

Bashkëpunimi ndërkombëtar është shumë i rëndësishëm për arritjen e synimeve dhe në Universitetin e Tetovës ne vazhdimisht punojmë për t’i arritur ato. Njëra nga shtyllat e ardhshme të arsimit të lartë në Evropë janë aleancat e universiteteve evropiane. Në Universitetin e Tetovës, ne kemi fituar tashmë përvoja të mëdha nga aleanca AURORA që krijon forma inovative bashkëpunimi mes 13 universiteteve evropiane. Universiteti i Tetovës është pjesë integrale e kësaj familjeje të zgjedhur universitetesh, që synon zhvillimin në kërkime shkencore, duke pasur në mendje gjithmonë kontributin dhe rolin e pashmangshëm të universiteteve në komunitetet që përfaqësojnë.

Rëndësi të posaçme i kemi kushtuar bashkëpunimit ndëruniversitar me universitetet shqiptare, universitetet nga rajoni dhe ato ndërkombëtare, duke intensifikuar marrëdhëniet ndërinstitucionale. Marrëveshjet e reja të bashkëpunimit me Universitetin e Insbrukut, Bukureshtit, Ajovës në SHBA, Alto Duro në Portugali, Universitetin e Maltës, Akademinë e Shkencave të Republikës së Shqipërisë; Akademinë e Arteve të Bukura në Pllovdiv, si dhe dhjetra marrëveshje ndërinstitucionale në kuadër të platformës Erasmus nga mbarë Evropa, janë dëshmi e përkushtimit tonë drejt ndërkombëtarizimit të Universitetit të Tetovës. Po ashtu si Universitet e kemi nënshkruar vazhdimin e Marrëveshjes me Magna Charta Universitatum;

Në vitin akademik 2021/22, Universitetit të Tetovës nga Agjencia kombëtare për arsimim evropian dhe mobilitet iu miratuan 80 mobilitete për studentë, 60 për studime dhe 20 për punë praktike, sikundër edhe 17 mobilitete për stafin akademik dhe administrativ. Të gjitha këto mobilitete janë shfrytëzuar dhe shkëmbimi është bërë në shtete të ndryshme të Evropës, siç janë: Gjermania, Suedia, Lituania, Çekia, Rumunia, Bullgaria dhe Turqia.

Edhe këtë vit kemi qenë të përkushtuar në përmirësimin dhe avancimin e kushteve të punës dhe studimeve, në fushën e investimeve kapitale, bashkë me Ministrinë e Arsimit kemi investuar në rikonstruimin dhe adaptimin e hapësirave të ish-rektoratit ku janë të vendosura Fakulteti i Kulturës Fizike, një pjesë e Fakultetit të Arteve, Fakulteti i Shkencave të Zbatuara, dhe Fakulteti i Teknologjisë Ushqimore. Me mbështetjen e Ambasadës së SHBA-së në vendin tonë e kemi përuruar Klinikën Juridike, e cila do t’u shërbejë studentëve të Fakultetit Juridik për realizimin e mësimit dhe punës praktike. Më tej, me donacionin e agjencisë turke për bashkëpunim dhe koordinim “Tika” u vu në përdorim Laboratori hulumtues i psikologjisë, i cili do të jetë në funksion të Fakultetit Filozofik.

Të nderuar të pranishëm,

Shfrytëzoj rastin të falënderoj të gjithë ata që me punën e tyre të palodhur, me talentin apo thjesht me mirësinë e zakonshme njerëzore, kontribuojnë çdo ditë në zhvillimin e Universitetit tonë. Kjo është puna jonë e përbashkët, e cila mbështetet jo vetëm nga udhëheqësia por edhe nga profesorët, pedagogët, stafi akademik, stafi administrativ, punonjësit në pension dhe veçanërisht nga numri i madh i studentëve dhe të diplomuarve. Unë dua t’i falënderoj shumë këta njerëz sot, gjithashtu të shpreh vlerësimin tim më të thellë për ta. Le të kujtojmë me mirënjohje të gjithë ata anëtarë të shquar të komunitetit akademik, të cilët nuk janë më me ne, puna e të cilëve jo vetëm që kontribuoi në zhvillimin e këtij Universiteti, por rrjedhimisht ndikoi edhe në formimin profesional e akademik të të gjithë atyre që patën nderin të punojnë me ta.

Studentët tanë janë shtylla e kësaj shtëpie. Ne po punojmë çdo ditë për të ndërtuar mirëqenien dhe një të ardhme të qëndrueshme si universitet. Studentët e sotëm janë ata që do të formësojnë të ardhmen dhe është detyra jonë si Universitet t’u ofrojmë atyre pikënisjen më të mirë të mundshme për ndryshimin e botës. Me gojën plot, Ju them, Universiteti jeni Ju!

Në mbyllje të fjalës sime, me lejoni të theksoj se ne të gjithë së bashku – studentë dhe profesorë, do të ecim të sigurt drejt së ardhmes me vendosmërinë dhe vizionin që këtë vatër të dritës dhe diturisë ta shndërrojmë në qendër-model të arsimit të lartë.

Qoftë i bekuar Universiteti i Tetovës!

Prof. Dr. Jusuf Zejneli
Rektor i Universitetit të Tetovës