Rektori i Universitetit të Tetovës, Prof. Dr. Jusuf Zejneli, së bashku me Kryetarin e Senatit, Prof. Dr. Vullnet Ameti, dhe Prorektorin për Shkencë, Prof. Dr. Agon Memeti, morën pjesë në inaugurimin e Muzeut të Asociacionit të Universiteteve Ballkanike dhe në punimet e Simpoziumit të Dytë të Menaxhimit, Dokumentimit dhe Bashkëpunimit Midis Bibliotekave të Ballkanit, që u mbajt në Universitetin e Trakisë.

Universiteti i Trakisë me inaugurimin e Muzeut të Bashkimit të Universiteteve të Ballkanit shënoi një moment të rëndësishëm, i cili u shoqërua edhe me organizimin e Simpoziumit të Dytë të Menaxhimit, Dokumentimit dhe Bashkëpunimit midis Bibliotekave të Ballkanit, një tubim shkencor me rëndësi për veprimtarinë e këtyre institucioneve.

Në kuadër të punimeve të simpoziumit, paneli i parë u fokusua në vizionin dhe misionin e BUA-së, me  katër panelistë njëherit edhe themelues të Asociacionit, nën moderimin e
Prof. Dr. Erhan Tabakoglu, Rektor i Universitetit të Trakisë; Prof. Dr. Yener Yoruk, ish-rektor i Universitetit të Trakisë; Prof. Dr. Ivan Ilchev, ish-rektor i Universitetit të Sofjes; Prof. Dr. Vullnet Ameti – Kryetar i Senatit të Universitetit të Tetovës dhe Prof. Dr. Nermina Hadzigrahic – Rektore e Universitetit të Tuzlës

Kryetari i Senatit të UT-së, në fjalën e tij para pjesëmarrësve, theskoi se qëllimi kryesor i Asociacionit të Universiteteve Ballkanike që nga krijimi i tij mbetet të përcaktojë një vizion udhëheqës për të ardhmen përmes universiteteve, bibliotekave, qendrave kërkimore në rajonin e Ballkanit duke u bazuar në vlerat e përbashkëta globale.

“I themeluar në vitin 2014, qëllimi kryesor i Asociacionit të Universiteteve Ballkanike, që nga krijimi i tij mbetet të përcaktojë një vizion udhëheqës për të ardhmen përmes universiteteve, bibliotekave, qendrave kërkimore në rajonin e Ballkanit duke u bazuar në vlerat e përbashkëta globale. Ky vizion përfshin nxitjen e bashkëpunimit shkencor edhe më të fortë, promovimin e dialogut ndërkulturor dhe krijimin e partneriteteve të qëndrueshme. Së bashku, kemi nisur projekte të përbashkëta kërkimore shkencore, si dhe kemi organizuar disa konferenca e simpoziume shkencore. Duke parë përpara, është e domosdoshme që të vazhdojmë t’i japim përparësi inovacionit, gjithëpërfshirjes dhe përsosmërisë në të gjitha përpjekjet tona. Duke shfrytëzuar talentet dhe burimet e ndryshme nëpër institucionet tona anëtare, ne mund të adresojmë sfidat e së nesërmes dhe të shfrytëzojmë mundësitë për rritje dhe zhvillim. Ndërsa reflektojmë mbi arritjet tona të së kaluarës dhe shikojmë drejt së ardhmes, le të riafirmojmë përkushtimin tonë ndaj vlerave të bashkëpunimit, integritetit dhe përsosmërisë akademike që përcaktojnë Asociacionin e Universiteteve Ballkanike. Është thelbësore të riafirmojmë përkushtimin tonë ndaj objektivave që udhëheqin misionin tonë”. Ai po ashtu shtoi se materializimi i këtij vizioni bëhet përmes formimit të një rrjeti shkencor në fushat e gjuhësisë, kulturës, artit, historisë, ekonomisë, arsimit dhe sportit; organizimi i programeve të përbashkëta diplomike; hapja e arkivit të përbashkët; hapja e Institutit të Gjuhës, Kulturës dhe Qytetërimit të Popujve Ballkanikë; duke bërë edhe më shumë projekte të përbashkëta shkencore, hulumtuese dhe inovative, si dhe duke organizuar programe shkëmbimi për stafin akademik dhe programe shkëmbimi për studentët brenda anëtarëve të BUA-së. Duke ndjekur me vendosmëri këto qëllime, ne mund të sigurojmë që Asociacioni i Universiteteve Ballkanike të mbetet një fener përsosmërie, inovacioni dhe bashkëpunimi në botën akademike.

Në sesionin e dytë Prorektori për Shkencë, Prof. Dr. Agon Memeti, e prezantoi punimin me titull: “Integrimi i sistemeve të menaxhimit të automatizuar në operacionet e universitetit – rasti i studimit: Universiteti i Tetovës”, duke nënvizuar rëndësinë e pranimit të përparimeve teknologjike në operacionet universitare.

Universiteti i Tetovës në të kaluarën ka udhëhequr me Asociacionin e Universiteteve Ballkanike dhe në kuadër të kryesimit të tij ka realizuar me sukses disa veprimtari shkencore njëherazi ka anëtarësuar edhe universitete të tjera në këtë asociacion me ndikim në Ballkanin Perëndimor.