Në kuadër të aktiviteteve promovuese për regjistrimet e vitit akademik 2026/2027, Fakulteti Ekonomik i UT-së realizoi me sukses një seri takimesh në shkollat e mesme të Strugës, Kërçovës, Gostivarit dhe Tetovës. Këto aktivitete kishin për qëllim informimin e maturantëve me ofertën bashkëkohore, programet studimore dhe mundësitë për zhvillim profesional që ofron ky fakultet.

Gjatë vizitave, përmes prezantimeve interaktive dhe punëtorive praktike të organizuara nga stafi ynë, maturantët u njohën me konceptin modern të studimeve në këtë njësi akademike. Përmes aktiviteteve konkrete dhe ushtrimeve praktike, nxënësit u inkurajuan të aplikojnë njohuritë teorike në situata reale, duke krijuar një përvojë më dinamike dhe më të afërt me realitetin profesional.

Punëtoritë interaktive dëshmuan rëndësinë e integrimit të praktikës në procesin arsimor, duke kontribuuar në zhvillimin e aftësive analitike, komunikative dhe profesionale të të rinjve. Një qasje e tillë jo vetëm që rrit interesimin dhe motivimin për studime universitare, por gjithashtu i ndihmon studentët e ardhshëm të përgatiten më mirë për kërkesat dhe sfidat e tregut të punës.

Po ashtu u promovuan programet studimore baçelor dhe master, ndërsa pjesëmarrësit u informuan mbi kurrikulat bashkëkohore, metodologjinë praktike të mësimdhënies, bashkëpunimet ndërkombëtare, si dhe mundësitë për mobilitet dhe pjesëmarrje në projekte shkencore.

Përfaqësuesit e fakultetit theksuan se programet studimore janë të dizajnuara në përputhje me nevojat e ekonomisë moderne dhe kërkesat e tregut të punës. Drejtimet si Ekonomi dhe Biznes, Financa dhe Kontabilitet, Marketing dhe Menaxhment, Turizëm dhe Hoteleri, Investigim dhe Kontroll Financiar, si dhe Shpedicion dhe Sigurime, u ofrojnë studentëve njohuri të avancuara teorike dhe kompetenca praktike të domosdoshme për ndërtimin e një karriere të suksesshme profesionale.

Përmes kësaj qasjeje inovative dhe të orientuar drejt praktikës, Fakulteti Ekonomik përgatit profesionistë të denjë, të aftë për të përballuar sfidat e ekonomisë globale dhe për të kontribuuar në zhvillimin ekonomik të vendit.

I përkushtuar ndaj cilësisë në arsim dhe zhvillimit të gjeneratave të reja, Fakulteti Ekonomik vazhdon të mbetet një ndër institucionet kryesore në përgatitjen e kuadrove profesionale, duke i ftuar të gjithë maturantët që të bëhen pjesë e rrugëtimit në vitin akademik 2026/2027.