Përfaqësues të Universitetit të Tetovës morën pjesë në Forumin Evropian të të Mësuarit dhe Mësimdhënies që u mbajt në Bochum të Gjermanisë

Më  8 dhe 9 shkurt 2024 përfaqësues nga Universiteti i Tetovës morën pjesë në Forumin Evropian të të Mësuarit dhe Mësimëdhënies që u mbajt në “Ruhr University” në Bochum të Gjermanisë. “Të mësosh për shoqërinë, në shoqëri, me shoqërinë” ishte tema boshte që u trajtua në këtë forum. Të frymëzuar nga vizioni i Shoqatës së Universiteteve Evropiane për vitin 2030, “Universitetet pa mure”, Forumi Evropian i të Mësuarit dhe Mësimdhënies 2024 eksploroi lidhjet e ndryshme midis përgjegjësisë shoqërore të arsimit të lartë dhe aktiviteteve të të mësuarit dhe mësimdhënies së universiteteve.

Ngjarja trajtoi të mësuarit nga tre këndvështrime: për shoqërinë, në shoqëri dhe me shoqërinë. “Për shoqërinë”,  sepse ka shumë mënyra në të cilat universitetet mund të kenë një ndikim si institucione të të mësuarit në shërbim të shoqërisë dhe ta demonstrojnë këtë, për shembull nëpërmjet të mësuarit të bazuar në komunitet dhe edukimit të hapur.

“Në shoqëri”, sepse universitetet mund t’i shërbejnë me të vërtetë shoqërisë vetëm nëse arsimi i lartë bazohet në një kuptim gjithëpërfshirës, të shkathët dhe largpamës të nevojave të të mësuarit dhe aftësive, për shembull përmes projekteve bashkëpunuese për të adresuar sfidat shoqërore.

“Me shoqërinë”, sepse universitetet kanë nevojë për shkëmbimin dhe angazhimin e të gjithë të përfshirëve dhe komunitetit të tyre më të gjerë për të kuptuar, për t’iu përgjigjur dhe për të adresuar kërkesat aktuale dhe të ardhshme të të mësuarit dhe aftësive, duke përfshirë në kontekstin e inteligjencës artificiale, për shembull nëpërmjet bashkëkurrikulimit dhe qasjeve të tjera të bashkëkrijimit për të nxënit dhe mësimdhënien.

Nëpërmjet një kombinimi sesionesh plenare dhe paralele, Forumi ofron një platformë për diskutim dhe shkëmbim praktikash mbi mënyrën se si universitetet t’i përmirësojnë mësimin dhe mësimdhënien. Forumi në fjalë synon të mbledhë profesionistë të arsimit të lartë që punojnë në nivele të ndryshme në çështjet e të mësuarit dhe mësimdhënies për të shkëmbyer dhe diskutuar praktikat institucionale dhe zhvillimet e politikave. Forumi është një ngjarje ideale për prorektorët për çështjet akademike, për dekanët, drejtuesit e qendrave mësimore dhe menaxhmentin e përfshirë në mësimdhënie dhe mësimnxënie. Ai gjithashtu mirëpret studentët, politikëbërësit dhe aktorë të tjerë në arsimin e lartë.