Rektori i UT-së, Prof. Dr. Jusuf Zejneli, gjatë ditës së sotme priti në një takim pune Ministrin e Shëndetësisë z.Ilir Demiri. Fillimisht Rektori Prof. Dr. Jusuf Zejneli e përgëzoi Ministrin për detyrën e re. Ai po ashtu shprehu gatishmërinë e tij që në mes Universitetit të Tetovës dhe Ministrisë së Shëndetësisë të thellohet bashkëpunimi në interes të përbashkët për të dy institucionet. Universiteti i Tetovës deri tani ka pasur një bashkëpunim të frytshëm me z.Ilir Demiri, i cili më herët ka mbajtur funksionin e drejtorit të Spitalit Klinik të Tetovës. Përndryshe, Fakulteti i Shkencave të Mjekësisë i Universitetit të Tetovës, për herë të parë gjatë këtij viti akademik hapi konkurs për paraqitjen e kandidatëve për regjistrim ose miratim të specializimeve të profesionistëve të shëndetësisë me arsimim të lartë në fushën e mjekësisë dhe bashkëpunëtorëve shëndetësorë me arsimim të lartë. Të dyja palët u zotuan t’i fuqizojnë edhe më tepër bashkëpunimet ndërmjet të dy institucioneve, ashtu që së bashku të ofrojnë më të mirën për studentët.
